Zeedel 2023

Schnitzelbangg

s’Kuni usem Gundeli

Prattele & Chaiseraugscht 2023

 

Salli zämme scheen sind ihr do,

Mir hoffe mir dien e Gspritzte bykoh,

Ihr sehnt y ha hytt miesse pressiere,

S hett nit mol glängt zem d Bai rasiere.

 

40 joor sy gnueg maint dr Kari,

Und singt s letscht mol am larifari,

Dyni värs hänn aifach immer gsässe,

Und dr hüftschwung wärde mir nie vergässe.

 

Im hobbyländ herrscht e riese buff,

Wäg de barriere sy d chaiseraugster muff,

Zem goh boschte du aarme maa,

Muesch uffem konto millione ha.

 

Jungi Fraue wänn kai BH meh trage,

Das liggt mir bitzli uffem Maage,

Dä Trend mach y nit mit als Modärni Frau,

Sunst sinn denn myni Gnei no blau.

 

Im bundeshuus, das isch s gröschti,

Gitts ney zem mittagässe röschti,

Y frog my was gitts derzue,

Wohrschyns e würschtli - vo däne hätts jo gnue

 

Zerst off denn zue grad drüber abe,

Scho wieder zue ghörsch e sone schabe,

Das isch kai värs yber d Hobbyländ barriere,

Dasch e värs yber d Adlermissere.

 

 

D Migros losst e Abstimmig laufe,

Ob sy kinftig soll Alkohol verkaufe,

E dittligs NAI hett d Umfrog ergeh,

Dasch aso quasi e Schnapsidee

 

Ych heer ständig vo klimakläber so sache,

Und dängg y will jetzt au epis mache,

Am wiehnachtsmäärt ha ychs lycht ybertriebe,

Und by am Gliehwyystand kläbe bliebe.

 

S Kuppelwyser Käthi kunnt im Bürgerhuus,

Zem Lift erscht noch Stunde wieder us,

Sy duurt my au hytt no neyme dure,

Sy hett jo niemer gha zem schnurre.

 

My Maa isch au - das wär nyt fir my,

Z Prattele an dem Swingfescht gsy,

Wo d Beatrice Egli singt merggt er laider,

Er isch dr ainzig ohni Glaider

 

Y ha e supper idee grad gha,

Nimm dr e byschpil liebi barbara,

an de barriere die hänn ihre raiz,

Die sy öffter s offe all dyni baiz.

 

Ych ha d läbere verkauft vo mym maa,

Und d niere vom nochber näbe drah,

Au mit drogehandel verdien y e huffe frangge,

So kah ych mys auto wieder tangge

 

Ych ha im Eventdorf e Gleepfer bstellt,

Wills my vor Hunger fadt yberstellt,

No by ych in d Ferie, ha d Styyrerklärig gmacht und drno,

Isch dä Gleepfer ändligg koh.

 

Drämmli drämmli drämmli drämmli,

Hänn myserabli schiene nämmli,

Trotz mym alter das sag ych ihne,

Ha ych no die bessre schiene