Zeedel 2022

Fasnacht 2022 Prattele

 

Salli zämme scheen sinn ihr alli do,

ych finds scheen ass ych darf vor eych stoh,

ych by s’Kuni usem Gundeli und frey my wieder z singe,

y hoff ass ych eych kah zem lache bringe.

 

Jetzt hett dr Federer e Drämmli das isch toll,

und das Drämmli das isch immer voll,

aber under uns s beschte an däm Kaarre,

isch ass dr Roger - nit duet sälber faahre.

 

Apropos Drämmli - hänn ihr s au vernoh,

d Verlängerig bis uff Augst - duet doch nit koh,

dasch doch aber klaar gsy – hejo - das maini,

wenn me uff Drämmli wartet - kemme maischtens kaini.

 

Dr Ueli Muurer isch scho no e glatte,

amne Buurezmorge hett er ain uff dr Latte,

Im Freyhaitstryychlergwändli stoht er mit stolzer Bruscht,

dasch no koomisch, sunst hett er jo «kai Luscht».

 

Sie ych ha my letschti lifte loh,

dr Buuse au – doch s isch anderscht koh,

dr Doggter rutscht ab – im grosse ganze,

jetzt sehts hald us als hätt ych e Ranze.

 

Bisch du e Lesbe oder bisch du eppe Schwuul,

stohsch dr zue ass de e Transe bisch – das find y cool,

au vegan sy find y nymm so dramatisch,

nur wenn d e Griene bisch – wirdsch mir nie sympathisch.

 

Syt 40 Joor singt dr Kari syni Schnitzelbängg,

syt 40 Joor isch er fir unsi Fasnacht e Gschängg,

syt 40 Joor sy syni Väärsli immer spitze,

doch laider duet dr Hüftschwung mitem Stöckli sym Stöckli nymm rächt sitze.

 

Au e Schwinger-Drämmli duet dur d Stroosse schlyyche,

wägem ESAF duet me das Drämmli anderscht stryyche,

ych finds no toll, s kunnt scheen drhär,

jetzt wärs no toll wenns amme pünggtlig wär.

 

Ych hätt gärn e Värsli yber dr Biegger Walti wette mache,

doch laider kunnt mir nyt in Sinn, dasch nit zem lache,

y ha studiert und yberlait s isch nit vyyl ybrig blyybe,

dr Biegger hett jo au scho lang kai Läserbrief meh gschriebe.

 

Ihr mergget rasch dä Värs isch scho e bitzeli e alte,

dr Walti dä duet wieder flyssig Läserbrief uffschalte,

drumm ziehn ych dä Värs vo vorhär zrugg s isch drumm e grossi Gfohr,

sunnst kunnt s’’Kuni no im näggste Brief denn vor.

 

Jä gopfritstutz und nundefahne Himmel Arsch und Zwirn,

gopferdeggel noonemool do läng y mir and Stirn,

dr Musk, dr Bezos und dr Branson kenne aifach e Rageete staarte,

und ych arme Tropf muess elle lang uffs Drämmli warte.

 

Hänn sy au emol bym Lerch e Fondu gässe,

das hett im Huug s Gschäft versaut das isch ganz vermässe,

Kussi de miesstischs wie dr Brüederli mache wenn fremdi Baize laufe,

gohsch verby und duesch die Knille aifach kaufe.

 

Bädniuus us de USA - jetzt glaub y doch y spinn,

nonemool Presi wärde haig dr Trömp im sinn,

ych hoff s syg nit wohr, was im Nääbelspalter stoht,

schyyns well au dr Blocher - zrugg in Bundesroot.

 

S Stöckli Vreni hett e neys Hobby und duet s sattele,

sy spielt bym Gaischterzug by dr Laiebühni Prattele,

sy macht das guet und kunnt in Fahrt goht zoobe spoot ins Bett,

ych hoff dass dr Kari jetzt dyhaim nit meh Theater hett.

 

Jetzt isch fertig, ais Wort das gitt s Ander,

ych sag nur no salli mitenander,

so das wärs gsy, ych muess wyter goh,

y ha drumm gheert s dät glyy e Drämmli koh.

 

 

Kuniusemgundeli@gmail.com